Кыргызстандагы Кумтөр алтын кенинин аймагында кар көчкү түшүп, анын алдында Италиядан келген беш турист калган. Бул тууралуу Кумтөрдүн басма сөз кызматы билдирди.

Маалыматка ылайык, окуя тууралуу билдирүү 4-май күнү саат 12:35 чамасында туристтик гиддерден түшкөн. Алардын айтымында, топ кенден болжол менен 23 чакырым алыстыкта болгон.

Окуя болгон жерге дароо медициналык бригада менен кошо кендин куткаруучулары жөнөтүлгөн. Ошол эле учурда маалымат Кыргызстандын Өзгөчө кырдаалдар министрлигине берилген.

Кызматкерлер аймакты учкучсуз учуучу аппараттардын жардамы менен алгачкы текшерүүдөн өткөрүшкөн. Төрт турист жеңил жаракат алып, стресс абалында табылып, аларга ошол жерде жардам көрсөтүлгөн.

Бешинчи туристти издөө бир нече саатка созулган. Ал саат 16:24тө табылып, моюн тарабында да жаракаттары бар экени маалымдалган. Андан кийин ал Өзгөчө кырдаалдар министрлигинин кызматкерлерине өткөрүп берилген.