Кыргыз Республикасынын Улуттук статистика комитетинин маалыматы боюнча, 2025-жылы өлкөнүн туризм тармагына 87 млн доллардан ашык түз чет элдик инвестиция тартылган. Бул 2024-жылга салыштырмалуу дээрлик 8 эсеге көп. КМШга кирбеген өлкөлөрдөн келген инвестициялар 11,8 эсеге, ал эми КМШ өлкөлөрүнөн келген инвестициялар 2 эсеге өскөн.

Инвестициялардын негизги көлөмү — бардык каражаттын 94%дан ашыгы — беш өлкөдөн келген: Нидерланддар — 72,8%, Бириккен Араб Эмираттары — 8,2%, Өзбекстан — 5,0%, Швейцария — 4,3% жана Орусия — 4,1%.

Туризмге багытталган түз чет элдик инвестициялардын өлкөдөгү бардык инвестициялардын жалпы көлөмүндөгү үлүшү 2024-жылдагы 1,1%дан 2025-жылы 6,7%га чейин өскөн.

Ошол эле учурда туристтик объектилерди — мейманканаларды, эс алуу жайларын жана башка инфраструктураны — курууга жумшалган инвестициялардын көлөмү азайган. 2025-жылы негизги капиталга 19,5 млрд сом инвестиция өздөштүрүлгөн. Бул 2024-жылга салыштырмалуу 27%га, ал эми 2021-жылга караганда 4,1%га аз.