Жалал-Абад жана Ош облустарынан эки бейтап инсульттан кийин толук сакайып, оор майыптыктан кутула алышты. КР Саламаттык сактоо министрлигинин маалыматы боюнча, жарандарды төрт сааттык критикалык убакыттын ичинде өз убагында ооруканага жаткыруунун жана заманбап тромболитикалык терапияны ыкчам жүргүзүүнүн аркасында сактап калууга мүмкүн болгон.

Окуялардын бири Жалал-Абадда 55 жаштагы бейтап менен, экинчиси Кара-Суу районунда 61 жаштагы Байыш Матисаков менен болгон. Эки бейтап тең кол-буттары кыймылдабай, сүйлөй албай калган оор абалда ооруканага түшүшкөн, бирок КТ жана МРТ аркылуу чукул диагностикадан өткөргөндөн кийин дарыгерлер альтеплаза препаратын ийгиликтүү колдонушкан. Дарылоонун натыйжасында эки жарандын тең кыймыл-аракеттери жана сүйлөө жөндөмү толугу менен калыбына келген.

Саламаттык сактоо министрлигинин штаттан тышкары башкы неврологу Асел Керимкулова белгилегендей, аймактарда тромболизисти (кандын уюп калышын эритүү) киргизүү — жер-жерлердеги дарыгерлерди системалуу окутуунун натыйжасы. Саламаттык сактоо министрлиги жарандарга инсульттун алгачкы белгилери байкалганда (беттин же кол-буттун уюшу, сүйлөө жөндөмүнүн бузулушу жана координациянын жоголушу) дароо тез жардам чакыруу зарылдыгын эскертет, анткени дарылоонун натыйжалуулугу дарыгерлерге кайрылуунун ылдамдыгына түздөн-түз көз каранды.