Талас облусунун Айтматов районундагы Ак-Башат айылында «Талас Органик» толук циклдүү агрокомплекси ачылды. Комплекс «Альянс Алтын» фонду тарткан 320 млн сом жеке инвестициянын эсебинен курулган. Бул Талас облусунда эл аралык органикалык өндүрүш сертификатына ээ болгон биринчи толук циклдүү агрокомплекс болуп саналат.

Комплекстин аянты 300 гектарды түзөт. Анын аймагында тамчылатып жана жамгырлатып сугаруу системалары орнотулган. Ошондой эле өзүнүн суу бассейни жана сыйымдуулугу 1500 тонналык климаттык кампасы бар.

Толук цикл өсүмдүктөрдү өстүрүүнү, түшүм жыйноону, калибрлөөнү, муздатууну жана сактоону, таңгактоону, ошондой эле продукцияны сатууну камтыйт.

Биринчи сезондо органикалык картошка 35 гектар жерге айдалып, андан кийин Казакстанга экспорттоло баштаган. Келечекте агрокомплекстин аянтын 500 гектарга чейин кеңейтүү, жаңы өсүмдүктөрдү киргизүү жана фермерлерди органикалык өндүрүш технологияларына окутуу пландалууда.

Министрликте белгиленгендей, долбоор органикалык айыл чарбасына жеке инвестицияларды тартууга, заманбап өндүрүштүк жана кампалык инфраструктураны өнүктүрүүгө, фермерлер үчүн жаңы мүмкүнчүлүктөрдү түзүүгө жана өлкөнүн экспорттук потенциалын кеңейтүүгө багытталган.