Кыргызстандын Маданият министринин орун басары Салкын Сарногоева Дүйнөлүк кол өнөрчүлүк кеңешинин (WCC AISBL) президенти Саад Аль-Каддуми баштаган абройлуу делегациясы менен сүйлөшүүлөрдү жүргүздү. Эл аралык миссиянын курамына АКШ, Малайзия, Казакстан жана Жаңы Зеландиядан келген эксперттер жана уюмдун кураторлору да кирген.

Жолугушуунун негизги темасы салттуу элдик кол өнөрчүлүктү сактоо жана өлкөнүн креативдүү экономикасынын негизги кыймылдаткычы катары кыргыз кол өнөрчүлүгүнүн потенциалын ачуу болду. Тараптар биргелешкен окутуу программаларын жана ата мекендик чеберлерди түз колдоо механизмдерин ишке киргизүүнү белгилешти.

Сүйлөшүүлөрдүн жыйынтыгында эл аралык кызматташтыкты кеңейтүү боюнча макулдашууга жетишилди. Бул кыргызстандык кол өнөрчүлөргө уникалдуу улуттук продукцияны WCC уюмунун абройлуу дүйнөлүк көргөзмөлөрүнө жана жарманкелерине үзгүлтүксүз тартуулоого мүмкүнчүлүк берет.