Шанхай кызматташтык уюмунун (ШКУ) саммити жана Дүйнөлүк көчмөндөр оюндарынын (ДКО) өткөрүлүшүнө байланыштуу, «Манас» эл аралык аэропорту 2026-жылдын 31-августунда жана 1-сентябрында өзгөчө иштөө режимине өтөт. Бул тууралуу «Кыргызстан аэропорттору» ААК билдирет.

Мамлекет башчыларынын жана расмий делегациялардын учактарын кабыл алууну жана тейлөөнү камсыз кылуу максатында, күндүзгү убакытта үзгүлтүксүз жүргүнчү ташуучу каттамдарды кабыл алууга жана жөнөтүүгө убактылуу чектөөлөр киргизилет.

31-августта чектөөлөр саат 09:00дөн 20:00гө чейин күчүндө болот. Бул аралыкта саммиттин катышуучуларынын келишине байланыштуу жүргүнчү ташуучу каттамдарды кабыл алуу жана жөнөтүү убактылуу чектелет. 
1-сентябрда аэропорт өзгөчө режимде ишин улантат. Жүргүнчү ташуучу каттамдарды аткарууга чектөөлөр саат 10:00дөн 22:00гө чейин созулат.

Учурда «Кыргызстан аэропорттору» ААК авиакомпаниялар менен биргеликте зарыл болгон координациялык жана маалыматтык иштерди жүргүзүүдө.

Ташуучуларга расписаниени алдын ала оңдоп-түзөө: айрым каттамдарды башка жеткиликтүү убакытка жылдыруу же зарылчылык болсо аларды токтотуу сунушталды.

Ошол эле учурда «Манас» эл аралык аэропорту ишин толугу менен токтотпойт. Түнкү убакытта, чектөөлөр жок мезгилде, аэропорт жүргүнчү ташуучу каттамдарды тейлөөнү улантат.

«Кыргызстан аэропорттору» ААК 31-августта жана 1-сентябрда сапарга чыгууну пландаган жүргүнчүлөрдөн расписаниени кунт коюп байкап турууну, каттамдын статусун түздөн-түз авиакомпаниядан алдын ала тактоону жана учуп кетүү же учуп келүү убактысынын мүмкүн болгон өзгөрүүлөрүн эске алууну суранат.

Убактылуу чектөөлөр саммит учурунда коопсуздукту камсыз кылуу жана расмий делегацияларды кабыл алууну уюштуруу зарылчылыгына байланыштуу.

Компания жаралган мүмкүн болгон ыңгайсыздыктар үчүн кечирим сурайт жана жүргүнчүлөрдөн аэропорттун ишиндеги убактылуу өзгөрүүлөргө түшүнүү менен мамиле кылууну өтүнөт.