Бишкекте 16-августта VI Дүйнөлүк көчмөндөр оюндарынын (ДКӨ) ачылыш аземинин репетициясына байланыштуу транспорт кыймылы убактылуу чектелет. Бул тууралуу борбор калаа мэриясынын басма сөз кызматынан билдиришти.

Чектөөлөр саат 11:00дөн 19:00гө чейин күчүндө болот.

Унаа кыймылы төмөнкү тилкелерде жабылат:

— Аалы Токомбаев проспектиси — Чортеков көчөсүнөн Барпы Алыкулов көчөсүнө чейин;

— Д. Күйүкова көчөсү — Чортеков көчөсүнөн Махатма Ганди (мурунку Муромская) көчөсүнө чейин;

— Эр-Тайлак көчөсү — Чортеков көчөсүнөн Арча-Бешик көчөсүнө чейин.

Мэриядан түшүндүрүшкөндөй, чектөөлөр иш-чаранын катышуучуларынын жана конокторунун коопсуздугун камсыз кылуу, ошондой эле VI Дүйнөлүк көчмөндөр оюндарынын ачылыш аземинин репетициясын өткөрүү максатында киргизилүүдө.