Кыргызстандын Чек ара кызматынын төрагасы генерал-майор Абдикарим Алимбаев «Манас» эл аралык аэропортундагы жана мамлекеттик чек арадагы негизги өткөрмө пункттарындагы өздүк курамдын даярдыгын жеке өзү текшерди.

Текшерүүнүн башкы максаты — алдыдагы ШКУ саммити менен VI Дүйнөлүк көчмөндөр оюндарынын алдында чек арачылардын расмий делегацияларды жана туристтерди тосуп алууга болгон даярдыгын көрүү. Ведомство жетекчиси көзөмөл-өткөрмө пункттарынын ишин, чек ара наряддарынын кызмат өтөөсүн жана жалпы кызматтык тартипти баалады.

Чек ара кызматынын башчысы чек арачыларга өлкөгө кирүүчү бардык багыттарда күчөтүлгөн кыраакылыкты жана коопсуздукту сактоо менен бирге, узун кезектерге жол бербей, жарандарды тез жана сапаттуу текшерүүнү камсыз кылуу милдетин койду.