Эртең, 23-июндан, тарта Бишкек шаарында Фучик көчөсүнөн «Манас» эл аралык аэропортуна чейинки жол тилкесинде реконструкция иштери башталат. Бул тууралуу шаар мэриясы билдирди.

Биринчи этапта, 23-июндан 1-июлга чейин, аэропорттон Манас айылына чейинки (Фрунзе көчөсү, 1/1 дарегине чейин) 8 чакырымдык тилкеде унаа кыймылына чектөө киргизилет. Жол толугу менен жабылбайт: көчөнүн бир тарабы оңдолуп жаткан учурда, унаалар экинчи тарабы менен эки багытта жүрө алышат.

Бул ыкма транспорттук байланышты үзбөй, жүргүнчүлөр үчүн ыңгайсыздыктарды азайтуу максатында тандалып алынган. Чектөөлөр иштердин жүрүшүнө жараша этап-этабы менен киргизилип турат.

Бишкек шаарынын мэриясы айдоочуларды жана конокторду жолго чыгаарда бул өзгөртүүлөрдү эске алууга чакырды.