Президент Садыр Жапаров Министрлер кабинетине кызматкерлердин орточо эмгек акысын сактоо менен Кыргызстандын айрым аймактарында убактылуу кошумча эс алуу күндөрүн белгилөөгө мүмкүндүк берген жарлыкка кол койду.

Жаңы механизм 2026-жылдын 15-июлунан 2027-жылдын 1-июлуна чейин сыноо режиминде иштейт. Чечимдер жергиликтүү өз алдынча башкаруу органдары менен макулдашуунун негизинде кабыл алынышы мүмкүн.

Кошумча эс алуу күндөрү калкка жагымдуу шарттарды түзүү, эл аралык жана республикалык иш-чараларды өткөрүү, ошондой эле ыкчам чара көрүүнү талап кылган башка өзгөчө учурларда киргизилет.

Эмгек, социалдык камсыздоо жана миграция министрлигине 2027-жылдын 1-февралына чейин жаңы механизмдин ишинин жыйынтыгына баа берүү тапшырылды. Эгерде эксперимент ийгиликтүү деп табылса, мекеме мыйзамдарга тийиштүү өзгөртүүлөрдү киргизүү боюнча сунуштарды даярдайт.