Кыргыз Республикасынын Мамлекеттик салык кызматы (МСК) жеке ишкерлердин буга чейин берилген мамлекеттик каттоо тууралуу кагаз жүзүндөгү күбөлүктөрүн санариптештирүүнү аяктады.

Мунун аркасында ишкерлер эми каалаган убакта «Салык төлөөчүнүн кабинети» аркылуу документтин электрондук версиясын өз алдынча көчүрүп ала алышат. Мында күбөлүктү жоготуп алгандыгы тууралуу жарыя жарыялоо зарылдыгы жоюлду.

Эске салсак, 2022-жылга чейин жеке ишкерлердин мамлекеттик каттоосу тууралуу күбөлүктөрү кагаз форматында гана берилчү. Салык төлөөчүнүн каттоо картасын жана/же күбөлүгүн жоготуп алган учурда, ишкер расмий басылмага документти жоготкону жана аны жараксыз деп таануу тууралуу жарыя берүүгө мажбур болчу.

Күбөлүктү электрондук түрдө алуу үчүн cabinet.salyk.kg сайтындагы «Салык төлөөчүнүн кабинетине» кирип, башкы беттен «ЖИ мамлекеттик каттоосу тууралуу күбөлүктөр» бөлүмүн тандап, документти көчүрүп алуу керек. Зарыл болсо, аны жоготуу жөнүндө жарыя жарыялабастан жана кошумча жол-жоболордон өтпөстөн, каалаган убакта басып чыгарууга болот.

МСК бул сервисти киргизүү жарандардын салык органдары менен өз ара аракеттенүүсүн жөнөкөйлөтүүгө, ишкерлердин убактысын жана каржылык чыгымдарын кыскартууга, ошондой эле санариптик мамлекеттик кызматтарды андан ары өнүктүрүүгө багытталганын белгилейт.