Нарын мамлекеттик жаратылыш коругу Франциянын Osi-Panthera уюму менен биргеликте жапайы фаунага масштабдуу мониторинг жүргүзүүдө. Коруктун адам бара алгыс аймактарына экологдор жаныбарларды табигый чөйрөсүндө тынымсыз байкоо үчүн фотокапкандардын тармагын орнотушту.

Камералардын объективине бийик тоолуу аймактардын эң сейрек кездешүүчү, Кызыл китепке кирген жашоочулары — илбирс, күрөң аюу жана башка жаныбарлар түшүп калды. Топтолгон фото жана видеоматериалдар жаныбарлардын санын баалоого, миграциялык жолдорун изилдөөгө жана браконьерлерден коргоону күчөтүүгө негиз болот.

Бул изилдөөлөр Кыргызстандын Кызыл китебинин жаңы басылышына даярдык көрүлүп жаткан учурда өзгөчө мааниге ээ. Учурда өлкөнүн жаратылышты коргоо тизмесине сүт эмүүчүлөрдүн 23 түрү, канаттуулардын 57 түрү, балыктардын 7 түрү, жерде-сууда жашоочулардын жана сойлоп жүрүүчүлөрдүн 10 түрү, ошондой эле муун буттуулардын 18 түрү киргизилген.