2026-жылдагы мусулмандар үчүн ыйык Рамазан айы 19-февралда башталат. Бул тууралуу Кыргызстан мусулмандарынын дин башкармалыгы билдирди.

Орозонун башталыш күнү Өзбекстанда өткөн Түрк мамлекеттеринин уюмуна мүчө өлкөлөрдүн муфтийлер кеңешинде бекитилди. Күндүн эл аралык деңгээлде макулдашылышы аймактагы өлкөлөргө орозону бир убакта баштоого мүмкүнчүлүк берет.

Орозонун биринчи күнү 19-февралга (бейшемби) туура келет. Анын алдында, 18-февраль күнү кечинде Кыргызстандын мечиттеринде таравих намазы окула баштайт. Дин башкармалыгы орозого руханий жактан даярдануунун маанилүүлүгүн жана диний нормаларды сактоо зарылдыгын эскертет.