Ош шаарында Курманжан Датка жана Жибек-Жолу муниципалдык аймагына караган Увам каналын тазалоо иштери жүрүүдө. Бул тууралуу шаар мэриясы кабарлады.

Учурда мэриянын атайын техникалары каналдагы таштанды жана калдыктарды чыгарып, аймакты иретке келтирүүдө. Ошондой эле коопсуздукту камсыздоо максатында каналдын жээктерин тосуу иштери жүрүп жатат.

Мэрия каналды тазалоо суунун тоскоолдуксуз агышын камсыз кылып, сел жана суу ташкыны коркунучун азайтууга багытталганын билдирди.

Эске салсак, Ошто ошондой эле Ак-Буура дарыясынын 17 чакырымын тазалоо иштери жүрүүдө. Тазалоо учурунда дарыядан 323 миң тоннадан ашык таштандылар жана сел калдыктары чыгарылганы айтылган.