Ош облусунда «Бими Ош Сервис» бажылык тариздөө жайынын пайдаланылбай турган имаратынан курал-жарак сакталган жашыруун жай табылды. Бул тууралуу Улуттук коопсуздук мамлекеттик комитети билдирди.

УКМК жана Мамлекеттик бажы кызматы биргеликте жүргүзгөн издөө иштеринин натыйжасында жашыруун жайдагы сейфтен 3 даана тапанча, 5 даана ок салгыч, 12 мм калибрдеги 31 даана патрон, 9х17 мм калибрдеги 47 даана патрон, 9 мм калибрдеги 14 даана патрон, 8 даана АМГ патрону жана 3 даана рация табылып алынган.

Учурда алынган курал-жарактардын жана ок-дарылардын келип чыгышын, ошондой эле аталган жайды уюштурган адамдарды аныктоо боюнча ыкчам-тергөө иштери жүргүзүлүп жатканы айтылды.