Бишкек шаарындагы Панфилов паркындагы аттракциондон кыз кулаган кырсык боюнча шектүү катары 24 жаштагы жаран кармалды. Бул тууралуу шаардын Биринчи Май райондук милициясы кабарлады.

Маалыматта айтылгандай, бул окуя боюнча Кылмыш-жаза кодексинин 297-беренеси (керектөөчүлөр үчүн коркунуч түзүү) менен кылмыш иши козголгон.

Шектүү катары 2001-жылы туулган Ш.А. аттуу жаран кармалып, убактылуу кармоочу жайга киргизилген.

Эске сала кетсек, 31-мартта Панфилов паркындагы аттракциондордун биринен 2006-жылы туулган Ш.Ж., аттуу кыз кулап, оор жаракат алып, ооруканага жеткирилген. Окуяга аттракциондогу эки коопсуздук курунун үзүлүп кетиши себеп болгону айтылган.

Аттракциондун ээсине 35 миң сом айып пул салынган.