Орусиянын президенти Владимир Путин Казакстандын президенти Касым-Жомарт Токаев менен Бишкектеги Шанхай кызматташтык уюмунун (ШКУ) мааракелик саммитинин алкагында жолугушту, деп билдирет Акорда.

Анын маалыматына караганда, мамлекет башчылары соода-экономикалык жана инвестициялык кызматташтыкты өнүктүрүүнү, биргелешкен долбоорлорду ишке ашырууну, ошондой эле эл аралык жана аймактык күн тартибиндеги актуалдуу маселелерди талкуулашты.

Жолугушуунун жүрүшүндө тараптар Казакстан менен Орусиянын ар кандай тармактардагы кызматташтыгы динамикалуу өнүгүп жатканын белгилешти.

Путин Токаевди Курултайга шайлоонун ийгиликтүү өтүшү менен куттуктады.

Орусия лидеринин айтымында, анын жыйынтыктары Казакстан президентинин өлкөнү мындан ары өнүктүрүү, ички саясий туруктуулукту чыңдоо, экономиканы өнүктүрүү жана калктын жашоо деңгээлин жогорулатуу багыты колдоого алынганын тастыктады.

Токаев Путинге куттуктоосу үчүн ыраазычылык билдирип, Казакстанда конституциялык реформанын алкагында жүргүзүлүп жаткан иштер тууралуу айтып берди.

«Казакстанды модернизациялоо процесси улуттук кызыкчылыктарга ылайык улантылат. Эч качан реформа үчүн эле реформа жасоого болбойт, муну биз жакшы түшүнөбүз. Биринчи кезекте жарандарыбыздын кызыкчылыктарына таянышыбыз керек», — деди ал.

Соода жана инвестициялар

Президенттер экономикалык кызматташууга өзгөчө көңүл бурушту.

Токаев Путиндин 2026-жылдын май айында Астанага жасаган мамлекеттик сапарын эске салып, аны тарыхый деп атады. Анын айтымында, Казакстандын өкмөтү ошондо жетишилген макулдашууларды ишке ашыруу менен алектенип жатат.

Казакстандын президенти ошондой эле өз ара сооданын өскөнүн белгиледи.

«Орусия биздин негизги инвестициялык жана соода өнөктөшүбүз бойдон калат деп ойлойм. Бул процессти мен ар тараптан колдойм», — деди Токаев.

Владимир Путин өз кезегинде эки мамлекеттин ортосундагы товар жүгүртүүнүн оң динамикасын белгиледи.

«Өткөн жылы бизде товар жүгүртүүнүн жакшы көрсөткүчтөрү болгон, ал эми быйыл ал дагы өстү. Биз маселелердин кеңири чөйрөсү боюнча иштеп жатабыз. Биздин күн тартибибизде ири долбоорлор да, кезектеги маселелер да бар», — деди ал.

Орусия лидери эки тараптуу келишимдерди ишке ашыруу боюнча өкмөттөр аралык комиссиянын ишине да оң баа берди.

60 миң казакстандык студент Орусияда окуйт

Путин гуманитардык кызматташууга өзүнчө токтолду.

Анын айтымында, Орусиянын жогорку окуу жайларында Казакстандан 60 миң студент билим алат. Мындан тышкары, жакында Омск шаарында Казакстандын алдыңкы жогорку окуу жайларынын биринин филиалы ачылды.

«Бизде дээрлик бардык маселелер боюнча байланыш эки тараптуу жүрүүдө. Бүгүн ушул маселелер комплексинин баарын сүйлөшүүгө мүмкүнчүлүк бар», — деди Путин.

Жолугушуунун жыйынтыгында президенттер соода-экономикалык жана инвестициялык өз ара аракеттенүүнү мындан ары бекемдөөнүн келечегин, ошондой эле өз ара кызыкчылык туудурган тармактарда биргелешкен долбоорлорду ишке ашырууну талкуулашты.

Мындан тышкары, Токаев менен Путин эл аралык жана аймактык күн тартибиндеги актуалдуу маселелер боюнча пикир алмашышты.