2025-жылы Кыргызстанда чет элдик инвестициялар катышкан 6 104 ишкана иштеген. Алардын арасында Орусия менен биргеликте түзүлгөн ишканалар эң көп. Орусиялык өнөктөштөрдүн үлүшү мындай ишканалардын жалпы санынын 35,4%ын, башкача айтканда, үчтөн биринен көбүн түзөт. Бул тууралуу Улуттук статистика комитети билдирди.

Биргелешкен ишканалардын саны боюнча экинчи орунда Кытай (20,3%), үчүнчү орунда Казакстан (11,2%), төртүнчү орунда Түркия (7,4%) турат.

Жыл ичинде чет элдик инвестициялар катышкан ишканалардын саны 6,6%га көбөйгөн. Ал эми 2021-жылга салыштырмалуу 1,9 эсеге өскөн. Бул ишканалардын 73,7%ында капитал толугу менен чет өлкөлүктөргө таандык.

Өнөктөштөрдүн көбү КМШ өлкөлөрүнөн. Алардын үлүшү 53,8%ды же 3 286 ишкананы түзөт. Калган 2 818 ишкана КМШга кирбеген өлкөлөр менен кызматташат.

Мындай ишканалардын дээрлик жарымы (45,8%) соода жана автоунааларды, мотоциклдерди оңдоо тармагында иштейт. Өнөр жайда 12,7%, кесиптик, илимий жана техникалык ишмердикте 8,4%, курулуш тармагында 5,4% ишкана иш алып барат. Ишканалардын 87%дан ашыгы Бишкек шаарында жайгашкан.