Ысык-Көлдө «Паруса духа – 2026: Экстрабилити кыймылы. Улантууну тандайбыз» эл аралык инклюзивдик долбоорунун биринчи этабы өтүп жатат. Регата 24-августта башталып, 5-сентябрга чейин уланат.

Долбоор «Росатом» мамлекеттик корпорациясынын колдоосу менен ишке ашырылууда. Быйыл тараптардын өнөктөштүгүнө 10 жыл толуп, юбилейлик сезон Борбор Азияда башталды.

Кыргызстандагы этапка Кыргызстан, Казакстан, Өзбекстан, Түркия жана Россиядан келген майыптыгы бар адамдар катышууда. Алардын арасында көзү азиз жана начар көргөн, угуусу начар жана аутизми бар адамдар бар. Ошондой эле волонтерлор, координаторлор, артисттер, коомдук лидерлер жана жергиликтүү уюмдардын өкүлдөрү катышууда.

Долбоордо майыптыгы бар адамдар жардам алуучу катары гана эмес, команданын толук кандуу мүчөсү катары иш-чараларды алып барууга жана уюштурууга катышат. Алар өз тажрыйбасы менен бөлүшүп, башкалардын жаңы мүмкүнчүлүктөрүн ачууга көмөктөшөт.

Катышуучулардын арасында Кыргызстандан Кыргыз азиздер жана дүлөйлөр коомунун кызматкери Арина Маркина, Казакстандан ырчы жана музыкант Диляра Асаинова, долбоордун Борбор Азиядагы координатору Михаил Войцеховский жана Түркиядан коомдук лидер Дурсун Арслан бар.

Долбоорго Жогорку Кеңештин депутаты Дастан Бекешев да колдоо көрсөттү. Анын айтымында, мындай демилгелер майыптыгы бар адамдардын коомдук турмушка толук кандуу аралашуусуна шарт түзөт.

«Бул жерде адамдар биригип, тең укуктуу негизде өз ара аракеттенүүнү үйрөнүп, ар бир адам өз мүмкүнчүлүгүн көрсөтө ала турган чөйрөнү түзүшөт. “Росатомдун” Кыргызстанда ишке ашырылып, мындан ары да өнүгүүгө багыт алган мындай демилгелерди колдоосу маанилүү деп эсептейм», — деди Бекешев.

Долбоордун жетекчиси Олег Колпащиковдун айтымында, «Паруса духа» — бул жөн гана парустук регата эмес.

«Биздин долбоордо майыптыгы бар адамдар жөн гана катышуучу эмес, жалпы кыймылды бирге түзгөн өнөктөштөр. Дал ушундай өз ара аракеттенүүнүн натыйжасында жаңы ролдор, жаңы демилгелер жана жаңы коомчулуктар пайда болот», — деди ал.

«Паруса духа» долбоору 2011-жылы башталган. 2016-жылдан бери ал «Росатомдун» колдоосу менен өткөрүлүп келет. Бул аралыкта долбоордун катышуучулары 16 өлкөдө болуп, 46 регата жана мелдеш өткөрүшкөн. 2026-жылдагы юбилейлик сезон Кыргызстан, Казакстан жана Түркияда өтөт.