Кыргызстандын президенти Садыр Жапаров «Борбордун статусу жөнүндө», «Ош шаарынын статусу жөнүндө» жана «Жергиликтүү мамлекеттик администрация жана жергиликтүү өз алдынча башкаруу органдары жөнүндө» мыйзамдарына өзгөртүүлөрдү киргизүү тууралуу мыйзамга кол койду.

Документке ылайык, Бишкек жана Ош шаарларынын мэрлери, ошондой эле жергиликтүү мамлекеттик администрация башчылары жылына эки жолу — февраль-март жана ноябрь-декабрь айларында тургундар менен жолугушууларды өткөрүүгө милдеттүү болушат.

Мыйзам бийлик органдарынын ишинин ачыктыгын жана айкындуулугун жогорулатууга, ошондой эле жергиликтүү мамлекеттик администрация башчыларынын (акимдердин) жана шаар мэрлеринин калк алдындагы жоопкерчилигин күчөтүүгө багытталган.

Мыйзам Жогорку Кеңеш тарабынан 2026-жылдын 10-июнунда кабыл алынган жана расмий жарыяланган күндөн тартып күчүнө кирет.