Кыргыз Республикасынын Президенти Садыр Жапаров Президентке караштуу Виртуалдык активдер жана блокчейн-технологиялар чөйрөсүн өнүктүрүү боюнча улуттук кеңештин жыйынын өткөрдү.

Өз сөзүндө Жапаров виртуалдык активдерди, блокчейн-технологияларды жана жаңы санариптик финансылык инструменттерди өнүктүрүү дүйнөдөгү технологиялык жана экономикалык трансформациянын негизги багыттарынын бирине айланып бара жатканын белгиледи. Анын айтымында, Кыргызстан глобалдык тенденциялардын нугунда ырааттуу бара жатат — бул тармактагы мыйзам базасын өркүндөтүп, зарыл болгон технологиялык жана финансылык инфраструктураны калыптандырууда. Ал эми бизнес жана инвесторлор тарабынан өсүп жаткан кызыгуу өлкөдө бул багыттын зор потенциалы бар экенинен кабар берет.

Президент мындан бир жарым жыл мурун Улуттук кеңештин түзүлүшү туура жана өз убагында кабыл алынган чечим болгонун белгиледи — бул аралыкта кеңеш тармакты өнүктүрүүгө бирдиктүү мамилени иштеп чыгуу үчүн мамлекеттик органдардын, кесипкөй жана эксперттик коомчулуктун, ошондой эле эл аралык өнөктөштөрдүн күч-аракетин бириктире алды. Жапаровдун айтымында, рыноктун активдүү өсүшү жана жаңы милдеттердин пайда болушу тармакты жөнгө салууну жана негизги демилгелерди координациялоону камсыз кылууга ыйгарым укуктуу Виртуалдык активдер жана блокчейн-технологиялар боюнча улуттук агенттикти түзүүнүн максатка ылайыктуулугун шарттады.

Жапаров ушундай жол менен стратегиялык максатка жетүү үчүн — Кыргызстанды виртуалдык активдердин жана блокчейн-технологиялардын аймактык хабына айлантуу үчүн институционалдык негиз бекемделип жатканын баса белгиледи. Ошол эле учурда, анын айтымында, аймактык хаб — бул технологиялар жана айрым долбоорлор гана эмес, бул заманбап жөнгө салууну, ишенимдүү инфраструктураны, адам капиталын, коопсуздукту, инвестициялык мүмкүнчүлүктөрдү жана эл аралык кызматташтыкты бириктирген бүтүндөй экосистема болуп саналат.

Президент мындай экосистеманын өнүгүшү бизнеске жана инвесторлорго гана эмес, жарандарга да пайда алып келиши керектигин — ар бир адам салттуу финансылык инструменттер менен виртуалдык активдердин ортосунда тандоо мүмкүнчүлүгүнө ээ болушу тийиш экенин белгиледи. Анын айтымында, мамлекеттин милдети — бул үчүн түшүнүктүү, ачык-айкын жана коопсуз чөйрөнү түзүп берүү, ал эми Улуттук кеңештин стратегиялык ролу ушул процесстерди координациялоо жана жалпы максаттардын тегерегинде мамлекеттин, бизнестин, эксперттик коомчулуктун жана эл аралык өнөктөштөрдүн күч-аракетин бириктирүүдө турат.