Президент Садыр Жапаров бүгүн, 20-июлда, Сауд Арабия Падышалыгына болгон жумушчу сапарынын алкагында Мединадагы Масжид Ан-Набавиге (Мухаммед пайгамбардын мечити) барды.
Өлкө башчынын басма сөз кызматы билдиргендей, президент Масжид Ан-Набавиде намаз окугандан кийин, Садыр Жапаровго Мухаммед пайгамбардын (САВ) сөөгү коюлган жерге кирүүгө жол ачышты.
Президент Садыр Жапаров кыргыз элинин бакубат жашоосун жана өлкөнүн гүлдөп-өнүгүшүн тилеп, дуба кылды.
Аль-Масжид ан-Набави (Пайгамбардын Мечити) — Сауд Арабиянын Медина шаарындагы эң чоң мечити жана Меккедеги Ыйык мечиттен кийинки эле исламдын экинчи ыйык жери. Дүйнөдөгү экинчи ири мечит жана Пайгамбардын (САВ) сөөгү коюлган жери болуп саналат.
Белгилей кетсек, Садыр Жапаров Сауд Арабияга болгон жумушчу сапарынын алкагында Мекке шаарында кичи ажылык амалын аткарган.
Биздин Телеграм каналга катталыңыз
