Кыргызстандын Президенти Садыр Жапаров Шанхай кызматташтык уюмуна (ШКУ) мүчө мамлекеттерге жана ишкер чөйрөлөрдүн өкүлдөрүнө биргелешкен долбоорлорду ишке ашыруу үчүн «Тамчы» атайын финансылык инвестициялык аймагынын мүмкүнчүлүктөрүн колдонууну сунуштады.

Бул тууралуу ал 1-сентябрда Бишкекте өткөн ШКУга мүчө мамлекеттердин башчыларынын Кеңешинин жыйынында билдирди. Жапаров «Тамчы» атайын финансылык инвестициялык аймагы 2026-жылдын июль айында Ысык-Көл облусунда ачылганын эске салды.

Президент бул сунушту ШКУ мамлекеттеринин ортосундагы экономикалык кызматташтыктын жаңы сапатына өтүү зарылдыгы тууралуу айтып жатып билдирди.

Жапаров ошондой эле уюмга мүчө өлкөлөрдүн транспорттук-логистикалык өз ара байланышын чыңдоонун маанилүүлүгүн белгиледи. Бул багыттагы негизги практикалык кадамдардын бири катары ал Кытай — Кыргызстан — Өзбекстан темир жолунун курулушун атады.

Мындан тышкары, президент ШКУну тең укуктуу өнөктөштүк мейкиндиги катары андан ары чыңдоону жактады.

«Биздин Уюм мындан ары да блоктошкон ой жүгүртүүдөн жана тирешүүдөн эркин бойдон калууга тийиш, ошондой эле ишенимди чыңдоо, тынчтыкты жана туруктуулукту камсыз кылуу аянтчасы катары кызмат кылышы керек», — деп баса белгиледи Жапаров.

КР башчысы ошондой эле ШКУнун жалпы технологиялык мейкиндигин калыптандыруу зарылдыгын белгиледи.

«Санариптик теңсиздик жаңы бөлүүчү сызык болуп калбашы үчүн мамлекеттердин заманбап технологияларга тең укуктуу жетүүсүн камсыз кылуу маанилүү», — деди президент.

Жапаров ошондой эле уюмга мүчө өлкөлөрдүн ортосундагы маданий-гуманитардык кызматташтыкты чыңдоонун маанилүүлүгүн белгиледи.

Саммиттин жүрүшүндө мамлекет башчылары эл аралык жана аймактык күн тартибин, коопсуздук, экономикалык жана маданий-гуманитардык өз ара аракеттенүү маселелерин талкуулашты.

Сөзүн жыйынтыктап жатып, Садыр Жапаров ШКУдагы төрагалык кылуу эстафетасын Пакистан Ислам Республикасына өткөрүп берди.

Жыйындын жыйынтыгы боюнча 28 документ кабыл алынып, кол коюлду.