Кыргызстан тышкы карызын төлөбөйт деген кооптонуулар жок. Бул тууралуу президент Садыр Жапаров «Кабар» агенттигине кезектеги маегинде билдирди.
Мамлекет башчынын айтымында, өлкөнүн тышкы карызы өз убагында төлөнөт.
«Бир күн да, бир саат да кеч эмес. Бул үчүн биздин күчүбүз жетиштүү. Бизде булактар бар. Эсиңиздерде болсо, мындан эки-үч жыл мурун ушундай кооптонуулар болгон. Тышкы карызыбызды кантип төлөйбүз деп баарыбыз тынчсызданганбыз, азыр андай кооптонуулар жок. Баары тынч болсо, бардык карыздардан кутулабыз. Акылбек Жапаров депутаттардын сырткы карызын жөн эле эскертип жатат», — деди Садыр Жапаров.
Мамлекет башчы айрым популист депутаттар экономиканын өсүшүнө өбөлгө түзгөн мыйзам долбоорлорун кабыл алууга атайын каршы чыгып жатат деп эсептейт.
«Акылбек Жапаров: «Тышкы карызды унутпагыла. Быйыл 270 миллион доллар төлөшүбүз керек. Андыктан киреше алып келе турган мыйзам долбоорлорун колдогула». Парламентте мен да бул боюнча депутаттарга кайрылдым. Экономикага келгенде популизмди ташташ керек», — деди Садыр Жапаров.
Президент Равшан Жээнбековдун анын тушунда өлкөнүн тышкы карызы 1 миллиард 200 миллион долларга өстү деген сөзүн четке какты.
«Бул жалган. Буга чейин кол коюлган келишимдерде алынган сумманын жарымы грант, жарымы насыя экени белгиленген. 2021-жылы бир дагы кредиттин суммасы 100 миллион доллардан ашкан эмес. Кандай болгон күндө да тышкы карызды жыл сайын төлөйбүз», — деди Садыр Жапаров.
