Инвестициялык долбоорлорду ишке ашыруу үчүн берилген жер тилкелеринин жалпы аянты өлкө аймагынын 0,1 пайызынан да аз бөлүгүн түзөт. Бул тууралуу бүгүн Кыргызстандын президенти Садыр Жапаров билдирип, «жер сатылып жатат» деген сөздөрдү таратпоого чакырды.

Мамлекет башчысынын айтымында, 2020-жылга чейин Кыргызстандын аянты 19 миллион 994 миң гектарды түзгөн. Коңшу өлкөлөр менен мамлекеттик чек аралар такталгандан кийин өлкөнүн аймагы 15 миң 572 гектарга кеңейип, учурда 20 миллион 9 миң 572 гектарды түзөт. Мунун ичинен аймактын 94,4 пайызы тоолуу аймактарга туура келет.

Президент тактагандай, айыл чарба багытындагы жерлердин жалпы аянты 6 миллион 732 миң гектарды түзөт. Анын ичинен 1 миллион 82 миң гектары жарандардын жеке менчигинде, ал эми ар кандай багыттагы 18 миллион 698 миң гектар жер — мамлекеттик жана муниципалдык менчикте турат.

Жапаров белгилегендей, 1992-жылдан бери инвесторлорго завод, фабрика, логистикалык борборлорду, энергетикалык жана туристтик объектилерди куруу үчүн 49 жылга чейинки мөөнөткө ижарага берилген көптөгөн жер тилкелери максатына ылайык өздөштүрүлгөн эмес. Акыркы беш жылдын ичинде мындай жерлерди кайра сатып жиберүү же максатсыз пайдалануу боюнча көптөгөн фактылар аныкталды.

Буга байланыштуу колдонуудагы мыйзамдарды кайра карап чыгуу сунушталууда.

«Инвесторлор өзүнө алган милдеттенмелерин өз убагында аткарышы керек. Эгерде аткарбаса, ижара келишимдери жокко чыгарылып, жер тилкелери долбоорлорду ишке ашырууга даяр болгон жаңы инвесторлорго берүү үчүн мамлекетке кайтарылат. Биз жерибизди сатпайбыз. Кыргызстандын аймагынын бир сантиметри да башка мамлекетке берилбейт. Бирок жерибиздин ар бир метри элдин жыргалчылыгына жана өлкөнүн өнүгүшүнө иштеши керек», — деп билдирди Жапаров.

Президент ошондой эле инвестициялык долбоорлордун тегерегинде коомдук пикирди манипуляциялоону токтотууга чакырып, инвестиция тартпай туруп экономиканын өнүгүшүн, жаңы өндүрүш ишканаларын жана жумуш орундарын түзүүнү камсыз кылуу мүмкүн эместигин баса белгиледи.

Мамлекет башчысы айыл жергесинде жеке турак жай куруу үчүн жер тилкелери менен камсыз кылуу маселесине өзүнчө токтолду. Анын айтымында, бул максаттар үчүн бош жерлер дээрлик калган жок, ошондуктан мамлекет айылдарда үч кабаттан беш кабатка чейинки көп батирлүү үйлөрдү курууну өнүктүрүүгө ниеттенүүдө.

Ал ошондой эле турак жай куруудагы жаңы ыкманын мүмкүнчүлүктөрүн көрсөтүү максатында, жакынкы арада ушундай долбоорлор ишке ашырылып жаткан калктуу конуштарга жеке өзү барып кабар аларын кошумчалады.