Министрлер кабинетинин төрагасы Адылбек Касымалиев саламаттыкты сактоо тутумунун кызматкерлерин Медицина кызматкеринин күнү менен куттуктап, алардын өлкөнүн өнүгүшүнө жана калктын жашоо сапатын жогорулатууга кошкон салымын белгиледи.

Минкаб башчысы ден соолук адамдын эң башкы байлыгы, ал эми медицина кызматкерлери — эң кадыр-барктуу, ардактуу жана жоопкерчиликтүү кесиптердин биринин өкүлдөрү экенин баса белгиледи.

Анын айтымында, саламаттыкты сактоо экономиканын маанилүү тармагына айланууда, ал эми бул тутумду өнүктүрүү мамлекеттин артыкчылыктуу багыттарынын бири бойдон калууда. Кыргызстанды өнүктүрүүнүн 2030-жылга чейинки Улуттук программасында жарандардын орточо жашоо узактыгын 75 жашка чейин жеткирүү милдети коюлган.

Касымалиев өлкөдө саламаттыкты сактоо чөйрөсүн модернизациялоо уланып жатканын белгиледи: медициналык кызмат көрсөтүүлөрдүн сапаты жогорулап, заманбап медициналык жана санариптик технологиялар киргизилүүдө, мамлекеттик каржылоонун көлөмү артып, инфраструктура жаңыланып жана медицина кызматкерлеринин эмгек акысы өсүүдө.

Ал ошондой эле илимдин, билим берүүнүн жана заманбап технологиялардын жетишкендиктерин өздөштүрүү менен кыргыз медицинасы өлкөнү өнүктүрүүнүн алдыңкы багыттарынын бирине айланып бара жатканын билдирди. Анын айтымында, дал ушул саламаттыкты сактоо тармагында инновациялар жигердүү киргизилип, колдонмо илим өнүгүүдө.

Касымалиев медицина кызматкерлерине кесипкөйлүгү, жан аябастыгы, сабырдуулугу жана өз кесибине берилгендиги үчүн ыраазычылык билдирди.

Сөзүнүн аягында ал аларга бекем ден соолук, бакубатчылык, ошондой эле коомчулуктун урмат-сыйына, ишенимине жана ыраазычылыгына бөлөнүшүн каалады.