Жогорку Кеңештин депутаты Дастан Бекешев Телеграм каналында 2023-жылдын 1-январынан тарта Салык кодексине кандай өзгөрүүлөр кирип жатканы тууралуу жазды.
Анын айтымында, 2022-жылы парламент Салык кодексине айрым жеңилдиктердин мөөнөтүн узарта турган өзгөртүүлөрдү кабыл алууга жетишпей калган. Эми 1-январдан тарта Салык кодексине жаңы эрежелер кирүүдө:
— Накталай эмес төлөм жүргүзгөн учурда да сатуудан алынуучу салыкты төлөөгө туура келет;
— бирдиктүү салык боюнча иштеп, акча жүгүртүү 8 млн сомдон ашпаса, 1%дык чен менен салык төлөш керек болот;
— айрым тамеки түрлөрүнө акциздик салык жана алтын камтыган эритмелерден түшкөн кирешеден алынуучу салык көтөрүлүүдө;
— 2022-жылы мүлк сатып алууга 300 миң сомдон ашык акча чыгым кылгандар же эл аралык уюмдардан киреше алгандар салык декларациясын толтурууга милдеттүү болот;
— банктык терминалдарды алып келүүгө белгиленген 0%дык чен жокко чыгарылууда.
«Азырынча кабатырланбай турса болот, балким парламент аталгандардын кээ бирин «арткы күн» менен жокко чыгарып коет», — деп жазды ал.
Биздин Телеграм каналыбызга катталыңыз
