Мамлекеттик салык кызматы мүлк салыгын Салык төлөөчүнүн кабинети аркылуу төлөөгө болорун эске салды. Бул үчүн системага кирип, башкы беттеги «Салыктык милдеттенмелер» бөлүмүнөн мүлк объектисин тандап, «Төлөө» баскычын басуу керек. Андан кийин система төлөм жүргүзүү үчүн QR-кодду жана банктык реквизиттерди автоматтык түрдө түзүп берет.

Салык кызматында белгилешкендей, мүлк салыгы боюнча билдирүүлөр салык төлөөчүлөргө жыл сайын 1-августтан кечиктирилбестен жөнөтүлөт. Аларды Салык төлөөчүнүн кабинетиндеги «Салык кызматы менен кат алышуу» → «Билдирүүлөр» → «Салык кызматынын билдирүүлөрү» → «Мүлк боюнча Салык кызматынын билдирүүсү» бөлүмүнөн көрүүгө болот. Документти көрүү, жүктөп алуу жана басып чыгаруу мүмкүнчүлүгү каралган.

Мекеме 1-сентябрга чейин төмөнкү салыктарды төлөө зарылдыгын эске салды:

• ишкердикте пайдаланылбаган турак үйлөр жана батирлер үчүн мүлк салыгы;
• үй жанындагы, короо-жай жана бакча жер тилкелери үчүн жер салыгы.

Кененирээк маалыматты аймактык салык органдарынан же Мамлекеттик салык кызматынын расмий сайтынан алууга болот.