Глобалдык өзгөрүүлөр доорунда өз ара урматтоо, тең укуктуулук жана маданий ар түрдүүлүктү таануу макроаймактагы ишеним менен туруктуулукту сактоого жардам берет. Бул тууралуу ШКУга мүчө мамлекеттердин маданият министрлеринин 23-жыйынында маданият министри Мирбек Мамбеталиев билдирди.

Анын айтымында, акыркы жылдары уюм теориялык макулдашуулардан биргелешкен долбоорлорду ишке ашырууга өтүп, мүчө мамлекеттердин ортосундагы гуманитардык кызматташтыкты чыңдап келет.

Министр бул процессте Чолпон-Ата шаарынын өзгөчө орду бар экенин белгиледи. Анын айтымында, шаар ШКУнун туристтик жана маданий борбору макамын алып, эл аралык фестивалдарды, кол өнөрчүлөрдүн көргөзмөлөрүн, чыгармачыл симпозиумдарды жана маданий диалогду өнүктүрүүгө багытталган башка иш-чараларды өткөрүүчү аянтчага айланды.

Мамбеталиев ошондой эле ШКУ өлкөлөрү жалган маалыматтын жайылышына каршы биргелешип күрөшүү үчүн негиз түзүп, журналистиканын кесиптик этикасына жаңы ыкмаларды иштеп чыгып, бирдиктүү коопсуз маалыматтык мейкиндикти калыптандыруу багытында маанилүү кадам жасаганын белгиледи.