Грек-рим балбаны Жоламан Шаршенбековдун жеке машыктыруучусу Хаким Махмудов «Даңк» медалы менен сыйланды. Бул тууралуу президенттин маалымат кызматы билдирди.

Хаким Махмудовго «Даңк» медалы дене тарбияны жана спортту өнүктүрүүгө кошкон зор салымы, ошондой эле республиканын квалификациялуу спортчуларын даярдагандыгы үчүн берилген.

Эскерте кетсек, Хаким Махмудов машыктырган балбан Жоламан Шаршенбеков Олимпиада оюндарынын коло байге ээси, дүйнөнүн эки жолку чемпиону жана эки жолу күмүш байгесинин ээси болгон, Азиянын үч жолку чемпиону жана эки ирет күмүш уткан, Азия оюндарынын жеңүүчүсү. Андан тышкары бир катар эл аралык мелдештердин жеңүүчүсү жана байге ээси.