Президент Сооронбай Жээнбеков парламенттик шайлоону өткөрүп, жаңы президентти шайлоо күнүн жарыялап коюп кызматтан кетет. Бул тууралуу өлкө башчынын маалымат катчысы Толгонай Стамалиева билдирди.

Стамалиеванын айтымында, президент бүгүн жаңы дайындалган премьер-министр Садыр Жапаров менен жолугушкан. Жолугушууда Жапаров тарабынан президенттин кызматтан кетиши тууралуу талап коюлган.

Сооронбай Жээнбеков учурда кызматтан кетүүгө укугу жок экенин айтып, парламенттик шайлоону өткөрүп, президенттик шайлоону жарыялап, мамлекетти мыйзамдуу жолго салып анан кызматын тапшырарын айткан.

10-октябрда өткөн Жогорку Кеңештин кезексиз жыйынында президент үч күндөн кийин арыз жазып кызматтан кетерин премьер-министр Садыр Жапаров айткан.