19-февралда парламенттин жыйынында депутат Эльвира Сурабалдиева Жогорку Кеңештин Эл аралык иштер, коргоо, коопсуздук жана миграция боюнча комитетинин төрайымы болуп шайланды.

Анын талапкерлигин «Адилет Кыргызстан» жана «Элдик» депутаттык топтору көрсөтүшкөн. Добуш берүүнүн жыйынтыгында Сурабалдиева аталган кызматка шайланып, бул тууралуу Жогорку Кеңештин тиешелүү токтому кабыл алынды.

Эске салсак, буга чейин аталган комитетти мурдагы депутат Эльдар Сулайманов жетектеген. Ал 17-февралда жеке арызынын негизинде депутаттык мандатын тапшырган.