Жалал-Абад облусунун Сузак районунда 33 жаштагы келин эки уулу менен көмүрдүн исине ууланып каза болду. Бул маалыматты Reporter.kg`ге облустук милициянын басма сөз катчысы Шеркул Турганбаев тастыктады.
Ал эми turmush.kg басылмасы райондун акими Эрмекбай Омошевге байланышып, келин балдары менен каза болгондон кийин эки күн үйдө жатып калганын жазды.
“Окуя 20-январдын түнүндө Кызыл-Сеңир айылында болгон. Келиндин Орусияда иштеп жүргөн жолдошу аялына байланыша албай кошуналарына чалган. Кошуналары келиндин үйүнө барганда анын балдары менен каза болуп калганын көрүшкөн. Маркум айылдагы мектепте санитардык кызматкер болуп иштечү. Ал 2013-2015-жылдары туулган эки баласы менен жашачу”, — деп билдирген аким.
