Сузак райондук соту жашы жете элек өгөй кызын зордуктаган 43 жаштагы Т.С.га карата өкүм чыгарып, аны өмүр бою эркинен ажыратты. Бул тууралуу 24.kg агенттиги жазды.

Маалыматка ылайык, соттун чечиминде айыпталуучу жабырлануучу тарапка 300 миң сом моралдык зыянды төлөп бериши керектиги да көрсөтүлгөн.

Эске салсак, апрель айында Акыйкатчы институту Жалал-Абад облусунун Сузак районунда 15 жашар кызды анын 43 жаштагы өгөй атасы 12 жашында зордуктап, андан кийин 2 жылдан ашуун ыплас ишин улантып келгенин маалымдаган. Сузак районунун милициясы кыздын өгөй атасына Кылмыш-жаза кодексинин 154-беренеси (зордуктоо) менен кылмыш ишин козгогон.