Кечээ, 1-июнда, Талас облусунда болгон катуу шамалдан улам бир катар имараттар жана унаалар жабыркады. Бул тууралуу Өзгөчө кырдаалдар министрлигинин (ӨКМ) облустук башкармалыгы билдирди.

Шамал Талас шаарындагы көп кабаттуу үйлөрдүн, медициналык лабораториянын жана бир дүкөндүн чатырларын учуруп кеткен. Ал эми Манас көчөсүндө көп кабаттуу үйдүн чатыры кулап, жол жээгинде турган эки автоунааны басып калган.

Мындан тышкары Талас районунун Көк-Токой айылында эки турак жайдын чатыры, дарбазасы жана эшиктери жараксыз абалга келген. Бакай-Ата районунун Боо-Терек айылында маданият үйүнүн 18 чарчы метр чатыры жабыркаган.

Мекеме учурда окуя болгон жерлерде тиешелүү кызматтар тазалоо жана калыбына келтирүү иштерин жүргүзүп жатышканын билдирди.