Талас шаарынан кыз ала качты делгендер Таш-Көмүр шаарында кармалып, факты тастыкталган эмес. Бул тууралуу облустук милициядан билдиришти.
Маалыматка ылайык, милицияга 6-майда Талас шаарынын Алия аттуу 19 жаштагы тургуну кайрылган. Анда, алардын үйүндө убактылуу жүргөн өзү менен тең бир тууган бөлөсү Маликаны Илгиз (аттары өзгөртүлгөн) аттуу бала Жалал-Абад шаарына ала качып кетти деп билдирген.
Текшерүү учурунда Малика Ильгиз аттуу жаран менен жолугуп, ошондон бери телефону өчүрүлүп, байланышка чыкпай жаткандыгы аныкталган.
Аталган факты 175-берене (Адамды никеге туруу максатында уурдоо) менен катталып, сотко чейинки өндүрүш иши башталган. Ыкчам топ тарабынан кызды салып кеткен “Тойота-Авенсис” үлгүсүндөгү автоунаа экендиги такталган.
Унааны жана андагы Маликаны табуу максатында тийиштүү иштер көрүлүп, ошол эле түнү Жалал-Абад облусунун Таш-Көмүр шаарынан кармалышкан. Унаада Малика, аны ала качты деген Илгиз аттуу жигит жана жанында эки досу менен кармалышкан.
Иликтөө учурунда “ала качылды” делген Малика аман-эсен табылып анын ден соолугуна жана эркиндигине эч ким кол салган эместиги жана ала качуу фактысы болгон эместиги аныкталган.
“Илгиз Малика менен мурунтан бери Бишкек шаарынан сүйлөшүп, кыз-жигит болуп жүрүшкөн. Маликаны келин кылып алабыз деп ата-энелери дагы макулдашып кеткендиги аныкталган. Бирок, макулдашкан убакыттан эрте эле Ильгиз атайын Талас шаарынан аны алып кеткени келгенин айткан”, — деп кабарланат.
Аталган факты боюнча тергөө иштери жүрүп жатат.
