Ушул жылдын 1-июнунан тарта Евразия экономикалык бирлигине (ЕАЭБ) мүчө мамлекеттерден Орусиянын аймагына товарларды алып кирүүнүн тартиби өзгөрөт. Бул тууралуу Кыргызстандын Мамлекеттик салык кызматы билдирди.

Жаңы эрежелерге ылайык, товарларды аталган өлкөгө экспорттоодо жеткириле турган жүк жөнүндө электрондук документти кабыл алуучу тарап — Орусиянын импорттоочусу тариздейт.

Орусияга товар импорттоочу тарап төмөнкү иш-аракеттерди аткарууга милдеттүү:

1. Орусиянын Федералдык салык кызматынын сайтындагы сервис аркылуу товар жеткирүү тууралуу электрондук документти тариздөө;
2. Камсыздоо төлөмүн киргизүү;
3. QR-код алуу.

Товар ташуучулар Орусиянын Федералдык бажы органдарынын талабы боюнча аталган QR-кодду көрсөтүүгө тийиш. Эгерде QR-код жок болсо же электрондук документтеги маалыматтар товарды коштоочу кагаздардагы маалыматтарга дал келбесе, жүк ташуучу унаа аталган мамлекеттин аймагына киргизилбейт.