Жасалма интеллект мамлекеттик башкаруунун сапатын жогорулатууга өбөлгө түзгөн технологиялык жана институционалдык жаңылануунун куралы боло алат. Бул тууралуу Кыргызстандын Президенти Садыр Жапаров Астанада өткөн Евразия экономикалык форумунун пленардык жыйынында сүйлөгөн сөзүндө билдирди.

Мамлекет башчысы форумдун «ЕАЭБ дүйнөлүк санариптик жарышта: жасалма интеллектке басым жасоо» деген темасы катышуучу-мамлекеттердин экономикасы жана коомдору үчүн эртеңки күндүн контурларын аныктай турганын белгиледи.

«Жасалма интеллект мындан ары IT-тармагы үчүн гана тар курал болуп саналбайт — бул жаңы реалдуулук», — деп баса белгиледи Жапаров.

Анын айтымында, мамлекет жетекчилери күн сайын миллиондогон жарандардын коопсуздугу, туруктуулугу жана жыргалчылыгы үчүн жоопкерчилик тартышат, ошондуктан жаңы технологияларды өнүктүрүү стратегиялык мамилени талап кылат.

Президент жасалма интеллекттин ыкчам өнүгүшү өлкөлөрдүн алдына маанилүү суроону — чет элдик санариптик технологиялардын жана алгоритмдердин пассивдүү керектөөчүсү болуп калбастан, бул ресурсту өз эгемендигин бекемдөө үчүн колдонууну кантип камсыз кылуу керек деген маселени коюп жатканын белгиледи.

Форумдун алкагында Жапаров ЕАЭБ өлкөлөрүнүн лидерлери менен бирге Alem.ai Жасалма интеллект эл аралык борборундагы санариптик жетишкендиктердин көргөзмөсү менен таанышты.

Президенттин администрациясынын басма сөз кызматы билдиргендей, экспозициянын негизги басымы санариптештирүүгө жана жасалма интеллект технологияларын киргизүүгө жасалган.

Көргөзмөдө ЕАЭБ өлкөлөрүнүн ЖИ тармагындагы иштеп чыгуулары, мамлекеттик кызматтарды санариптештирүү, ошондой эле мамлекеттик башкаруунун натыйжалуулугун жогорулатуу жана санариптик экономиканы өнүктүрүү үчүн заманбап технологиялык чечимдер көрсөтүлдү.

Кыргызстандын стендинде өлкөнүн фискалдык системасын өркүндөтүү үчүн колдонулган санариптик куралдар, анын ичинде салык жана бажы администрациялоо процесстерине жасалма интеллект технологияларын киргизүү боюнча чечимдер коюлду.