Жогорку Кеңештин депутаты Сеид Атамбаев жыйында ага маданият жана искусство ишмерлеринен кайрылуу келип түшкөнүн билдирди. Алар маданий багыттагы объекттердин акыркы убакта көп учурларда ажыратылып жатканына тынчсызданышууда.

Анын айтымында, катка жалпы 72 адам кол койгон — алардын арасында Кыргыз улуттук академиялык опера жана балет театрынын устаканаларынын эмгек сиңирген артисттери, кызматкерлери жана Архитекторлор союзунун мүчөлөрү бар.

«Кайрылууда опера жана балет театрынын устаканаларын ажыратууну токтотуп, аларды театрдын карамагында сактап калуу зарылдыгы айтылган. Ошондой эле цехтердин жылуулук системасын калыбына келтирүү жана техникалык жабдууларды жаңыртуу маселеси көтөрүлгөн», — деди депутат.

Мындан тышкары, кайрылууда «Учур» мамлекеттик жаштар театрынын айланасындагы кырдаал да айтылган. Атамбаевдин маалыматына ылайык, театр мурда Бишкек шаарындагы «Чатыр-Көл» кинотеатры жайгашкан имаратта иштеп келген, бирок быйыл ал имарат мэрия аркылуу алынып, театр туруктуу жайсыз калган. Натыйжада анын материалдык-техникалык базасы ар кайсы жерлерге бөлүштүрүлгөн.

Ошондой эле маданият ишмерлери Архитекторлор союзу жайгашкан имарат архитектуралык эстелик катары коргоодо турганы менен, бузуу коркунучу бар экенин белгилешкен. Учурда бул маселе боюнча соттук талаш-тартыштар жүрүп жатат.

Депутат бул кайрылуу мамлекеттик органдардын көңүл буруусун талап кылып, маданий инфраструктураны сактап калуу боюнча системалуу чечимдер керек экенин белгиледи.