Телефонду же капчыкты үйдө унутуп калсаңыз, эми дүкөндө бир гана алаканыңыз менен төлөй аласыз. Мындай технология — MPay Alakan — Кыргызстанда биринчи жолу MBANK тарабынан 6-октябрда MTalX 2026 жабык көрсөтүүсүндө тааныштырылды. Төлөмдү реалдуу убакыт режиминде банктын башкы директору Марат Торалиев өзү жүргүзүп көрдү.

Төлөм жүргүзүү үчүн накталай акча, карта же смартфон талап кылынбайт. Транзакция адам алаканын MKassa POS-терминалынын сканерине жакындаткан учурда ишке ашат. Сенсорлор алакандагы веналардын уникалдуу түзүлүшүн окуп, система алардын параметрлерин шифрленген кодго айландырат. Банктын маалыматына ылайык, мындай кодду сүрөт аркылуу көчүрүп алуу, кармап калуу же жасалмалоо мүмкүн эмес.

Торалиевден кийин технологияны блогер Мекен Кемел сынап көрдү. Ал алаканын бир нече мүнөттүн ичинде каттоодон өткөрүп, дароо эле сатып алган товары үчүн төлөдү.

«Башкы хедлайнер — MPay Alakan аркылуу алакан менен төлөө. Бул биздин технологиялык артыкчылыгыбыз», — деди Торалиев.

Бул MBANK 2025-жылы ишке киргизген MPay технологиясынын уландысы. Ал интернетке туташпай туруп төлөм жүргүзүүгө мүмкүндүк берет.

MTalX иш-чарасында банк башка жаңы технологияларын да көрсөттү. Mashina жана MHouse сервистери эми экосистемалык платформаларга айланды. Mashina платформасынын ай сайын 1 млн активдүү колдонуучусу бар. Ал эми MHouse кыймылсыз мүлктү сатып алуу, сатуу жана ижарага алуу, ошондой эле ипотеканы тариздөө мүмкүнчүлүктөрүн бириктирет.

Мындан тышкары, имлештирилген карталарды бир мүнөттүн ичинде чыгарууга мүмкүндүк берген картоматтар көрсөтүлдү. Карта алуу үчүн тиркемедеги QR-кодду колдонуу жетиштүү. Бүгүнкү күндө Кыргызстан боюнча 56 персоналдаштырылган жана 9 тез арада карта чыгаруучу картомат иштеп жатат.

Ошондой эле банк кыргыз жана орус тилдерин түшүнгөн жана тиркемедеги кызматтарды колдонууга жардам берген MIA үн жардамчысын тааныштырды.