Кыргызстандын тышкы иштер министри Жээнбек Кулубаев өлкөнү БУУнун Коопсуздук кеңешинин 2027–2028-жылдардагы туруктуу эмес мүчөлүгүнө шайлоо өнөктүгүндө пассивдүүлүк көрсөткөн айрым чет өлкөлөрдөгү мекемелердин жетекчилерин сынга алды. Бул тууралуу ТИМдин басма сөз кызматы билдирди.

24-августта Кулубаевдин төрагалыгы алдында тематикалык коллегиянын жыйыны өтүп, анда Кыргызстандын шайлоо өнөктүгүнүн жыйынтыктары чыгарылды.

ТИМдин маалыматына ылайык, жыйындын катышуучулары өлкөнүн талапкерлигин илгерилетүүгө ар бир элчинин кошкон салымын кеңири карап чыгышты. Ошол эле учурда жетиштүү деңгээлде активдүү иш алып барбаган айрым чет өлкөлөрдөгү мекемелердин жетекчилерине сын айтылды.

Мекемеден билдиришкендей, 2025–2026-жылдары өнөктүктүн алкагында 1,5 миңден ашуун эки тараптуу жолугушуу өткөрүлүп, көптөгөн өз ара сапарлар уюштурулган. Кыргызстандын дипломатиялык байланыштарынын географиясы Европадан жана Африкадан тартып Океанияга, Кариб бассейнине жана Латын Америкасына чейин кеңейген.

Бул мезгил аралыгында Кыргызстан дагы 15 мамлекет менен дипломатиялык мамиле түздү. Учурда республика БУУга мүчө 185 мамлекет менен дипломатиялык мамилелерди жүргүзөт.

Кулубаев өнөктүктүн жыйынтыгы президент Садыр Жапаровдун колдоосу жана координациясы, ошондой эле өкмөт менен дипломатиялык кызматтын ишинин аркасында мүмкүн болгонун белгиледи.

Жыйындын соңунда катышуучулар Кыргызстандын БУУнун Коопсуздук кеңешиндеги алдыдагы ишинин негизги багыттарын, ошондой эле ТИМдин түзүмдүк бөлүмдөрүн кадрдык жактан күчөтүү чараларын талкуулашты.