Кыргызстандын Тышкы иштер министрлиги Samara Academy уюмунун программалары аркылуу Германияга барган Кыргызстандын жарандарына байланыштуу кырдаалдын жагдайларын тактап жатканын билдирди.

ТИМдин маалыматына ылайык, текшерүү жалпыга маалымдоо каражаттарында жана социалдык тармактарда айрым кыргызстандыктар жумушсуз калганы тууралуу маалымат тарагандан кийин Кыргызстандын Германиядагы элчилиги менен биргеликте жүргүзүлүүдө.

Министрлик билдиргендей, учурда болгон окуянын бардык жагдайлары такталып жатат. Максат — зарыл болгон учурда жарандарга консулдук-укуктук жардам көрсөтүү жана алардын укуктары менен мыйзамдуу кызыкчылыктарын коргоо.

ТИМ жаңы маалыматтар түшкөн сайын коомчулукка кошумча маалымат бериле турганын кошумчалады.