Токмок шаарындагы автоунаа дөңгөлөктөрүн кайра иштетүүчү завод тесттик режимден толук кандуу иштөөгө өттү.

Ишкана 2023-жылдын август айында тесттик режимде иштей баштаган. Ал «Кумтөр Голд Компани» компаниясынын туунду ишканасы болуп саналат жана компаниянын маалыматына караганда, Кыргызстанда автоунаа дөңгөлөктөрүн кайра иштеткен жалгыз ишкана бойдон калууда.

Өндүрүш эски дөңгөлөктөрдү кайра иштетүү жана аларды калыбына келтирүү боюнча эки цехтен турат. Завод заманбап европалык жабдуулар менен жабдылган.

Төрт нөөмөт менен иштеген учурда ишкана дөңгөлөктөрдү кайра иштетип, жылына 6 миң тоннага чейин резина күкүмүн өндүрө алат. Ал резина плиткаларын, килемчелерди, спорттук жана балдар аянтчалары үчүн коопсуз жабууларды, бут кийим жана башка продукцияларды өндүрүүдө колдонулат.

Дөңгөлөктөрдү калыбына келтирүүчү цех 2025-жылдын башында тесттик режимде ишке киргизилген. Өткөн жылдын жай айларынан тарта калыбына келтирилген дөңгөлөктөр «Кумтөр» кенинде иштеген оор тоо-кен техникаларында сыноодон өтүп жатат.

Мындан тышкары, ишкана калдыктарды утилизациялоо жана кайра иштетүү боюнча лицензия алган. Бул заводго автоунаа дөңгөлөктөрүн утилизациялоо боюнча акы төлөнүүчү кызматтарды көрсөтүүгө мүмкүнчүлүк берет.