Базар-Коргон районунда дээрлик төрт айдан бери балдарын көрө албай жаткан аялдын иши боюнча райондук сот чечим чыгарды. Бул тууралуу Жалал-Абад облустук “Адилеттүүлүк” укук коргоо уюмунан билдиришти.
Маалыматка караганда, 2023-жылдын 12-январында Базар-Коргон райондук соту өз чечими менен мурда күйөөсү алып кеткен төрт баласын Базар-Коргон районунун тургунуна кайтарып берди. Мындан тышкары, сот жубайлардын ортосундагы никени бузуу боюнча чечим чыгарды.
Буга чейин аял дээрлик төрт айдан бери балдарын көрө албай жаткандыгы маалымдалган. Судья ар бир сот отурумунда ишти тез арада токтотууну же күйөөсүн балдар менен көрүүгө уруксат берүүнү милдеттендирүүнү суранганына карабай, процессти кийинкиге калтырып келген.
Жубайлар — 35 жаштагы Б.А. жана 29 жаштагы Х.М. 2011-жылы үй-бүлө курушкан. Алардын жашы жете элек төрт баласы бар.
2022-жылдын башында алардын ортосунда пикир келишпестик болуп, аялы балдарын алып, ата-энесине кеткен. Ошол убакыт аралыгында күйөөсү эч кандай материалдык жардам көрсөткөн эмес. Ал эми 2022-жылдын август айында аял Россияга иштөө үчүн кеткен.
Күйөөсү аялынын жоктугунан пайдаланып, алдоо жолу менен балдарын өзүнө алып кеткен. Аялынын ата-энесине балдарын сагынганын, алар менен болгусу келгенин айткан. Ата-энелер каршы болгон эмес, анткени алар жубайлардын пикир келишпестиктерин убактылуу деп эсептешкен.
Андан кийин күйөөсү аялынан балдары үчүн алимент талап кылып сотко кайрылган. Алимент өндүрүү боюнча соттун токтомун алган келиндин ата-энеси бул тууралуу кызына билдирүүгө аргасыз болушкан. Ошондой эле алар ага Б.А. балдарды кайтарбай жатканын билдиришкен.
Сентябрь айында Х.М. Россиядан кайтып келүүгө аргасыз болгон. Ал кайтып келгенден кийин алимент өндүрүү боюнча соттун токтомун жокко чыгаруу өтүнүчү менен сотко кайрылган.
Сотто аял күйөөсү ажырашуу үчүн сотко кайрылганын билген. Ал арызында алардын ортосунда мүлк жана балдар боюнча эч кандай талаш-тартыш болбогонун көрсөткөн. Бирок, талаш эки маселе боюнча дагы болгон.
Х.M. балдарын аны менен бирге калтырууну жана үй-бүлөлүк жашоонун жылдарында курулган үйдү биргелешип алынган мүлк деп таануу өтүнүчү менен утурлама доо арыз менен кайрылган.
Аялынын кызыкчылыгын коргоп жаткан Жалал-Абаддагы “Адилет” укук коргоо уюмунун юристи Элдор Бакировдун айтымында, бул жолу Базар-Коргон райондук сотунун судьясы ишти жылдырган жок.
«Сот акыры принципиалдуулугун көрсөттү. Ал ишти кийинкиге калтырбастан, иш боюнча конкреттүү чечим чыгарды жана эң негизгиси балдарды апасынан ажыраткан жок», — деп белгиледи жактоочу.
Мүлктү бөлүштүрүүгө байланышкан маселелер өзүнчө өндүрүштө каралат.
Биздин Телеграм каналга катталыңыз
