Күн мурун Түштүк Африка Республикасынын (ТАР) бир нече провинциясын катуу кар, нөшөрлөгөн жамгыр жана кыйратуучу шамал каптады, деп жазышат чет элдик ЖМКлар.

Аба ырайынын кескин бузулушунан улам бийлик тоо ашууларын жана бир нече жолду жапты. Айрым округдарда аба ырайынын кооптуулугунун «кызгылт сары» деңгээли жарыяланды.

ТАРдын Метеорологиялык кызматынын маалыматы боюнча, муздак атмосфералык фронт Фри-Стейт, Батыш Кап, Түндүк Кап, Чыгыш Кап, Гаутенг, Мпумаланга провинцияларын жана Квазулу-Наталдын ички аймактарын каптады. Синоптиктер абанын температурасы кескин төмөндөп, катуу шамал, кар жаап, ал эми жээк аймактарында шторм болорун божомолдошууда.

Ошондой эле, метеокызмат катуу жааган кардан улам кооптуулуктун «сары» деңгээли тууралуу да эскертүү таратты. Божомолдорго ылайык, ал транспорттук каттамдарды үзгүлтүккө учуратып, мал-жандыктардын бир бөлүгүнүн кырылышына жана айыл чарба өсүмдүктөрүнүн зыян тартышына алып келиши мүмкүн.

Тургундарга жолдордун айрым бөлүктөрү тайгак болуп, кар жана жамгыр жаашы күтүлүп жатканы, ал эми абанын температурасы нөлдөн төмөн түшөрү да эскертилди.

Жол кызматтары трассаларга туз аралашмасын себип жатышат. Айдоочуларды ылдамдыкты ашырбоого, унаалар ортосундагы аралыкты сактоого, башка унааларды ашып өтпөөгө жана жол полиция кызматкерлеринин көрсөтмөлөрүн так аткарууга чакырышты. Жергиликтүү тургундарга унаасында жылуу кийим, жууркан, суу, азык-түлүк, дары-дармек, кубаттагычы менен толук кубатталган телефон жана кол чырак ала жүрүү сунушталат.

Чыгыш Кап провинциясынын Транспорт башкармалыгы катуу жааган кардын айынан провинциянын түндүгүндөгү үч тоо ашуусу: Баркли, Пенхук жана Босмансхук жабылганын билдирди.