Бишкек — Раззаков каттамы менен бара жаткан Asman Airlines авиакомпаниясынын учагы экипаж техникалык индикацияны (эскертүүчү белгини) байкагандан кийин учуп чыккан аэропортуна кайтып келди. Бул тууралуу «Кыргызстандын аэропорттору» ААКтын басма сөз кызматы билдирди.

Компаниядан түшүндүрүшкөндөй, иштеп кеткен индикация аба кемесин өндүргөн ишкана тарабынан каралган стандарттык процедураларды аткарууну талап кылган.

«Авиакомпаниянын жана аэропорттун бардык кызматтары нормаларга так ылайык иш алып барып, толук өз ара аракеттенүүнү жана координацияны камсыздашты. Аэропорт алдын ала керектүү кызматтарды даярдыкка келтирди — бул мындай техникалык сигналдар пайда болгондогу стандарттык тажрыйба», — деп белгилешти басма сөз кызматынан.

Буга чейин аба кемеси Бишкек аэропортуна ийгиликтүү конгону маалымдалган. Конгондон кийин учакты сүйрөгүч унаанын (тягачтын) жардамы менен учак жүрүүчү тилкеден сүйрөп кетишкен.