Кыргызстандын Улуттук банкы 13-майда улуттук жана чет өлкө валютасында банктык операцияларды жүргүзүүгө бир эле учурда эки жаңы түзүмгө — «Кылым Банк» ААКка жана «Мурас Банк» ЖАКка лицензия берди.

«Кылым Банк» 100 пайыз мамлекеттик үлүшү бар мамлекеттик банк катары түзүлдү. Министрлер Кабинетинин Төрагасы Адылбек Касымалиевдин токтому менен банктын уставдык капиталы 1 млрд сом өлчөмүндө аныкталып, 2027-жылга чейин аны 5 млрд сомго жеткирүү пландалууда.

Ал эми «Мурас Банк» Кыргызстандын Юстиция министрлигинде жабык акционердик коом катары катталган. Банк чет элдик капиталдын катышуусу менен түзүлүүдө — анын жалгыз уюштуруучусу катары Сергей Ентц көрсөтүлгөн.

Reporter.kg маалымкаты: Сергей Ентц — банк чөйрөсүндө, баалуу кагаздар рыногунда жана өнүгүп келе жаткан рыноктордо каржы долбоорлорун башкарууда 30 жылдык тажрыйбасы бар эл аралык инвестор. Ентцтин өзүнүн айтымында, анын стратегиялык максаты — консалтинг, инвестициялык банкинг жана брокердик кызматтарды көрсөткөн эл аралык платформаны түзүү. Ал «Мурас Банктын» алкагында эл аралык фондулук биржаларда кыргызстандык баалуу кагаздар жана активдер менен операцияларды жүргүзүүгө басым жасоону көздөйт.