Кыргыз Республикасынын Улуттук статистика комитети өлкөдөгү туризм тармагынын 2026-жылдын январь–июнь айларындагы абалы боюнча маалыматтарды жарыялады.

Ведомствонун маалыматына караганда, жылдын биринчи жарымында өлкөдө 1,9 млн адам эс алды. Бул 2025-жылдын ушул эле мезгилине салыштырмалуу көп. 2026-жылдын 1-июлуна карата туризм тармагындагы чарба жүргүзүүчү субъекттердин саны 158,2 миңге жетти. Ал эми бул тармакта жеке ишкер катары эмгектенгендердин саны 140 миң адамды түздү. Бул катталган субъекттердин жалпы санынын 88,5%ын түзөт.

Өлкөдөгү туризм объектилери 604 мекеме менен көрсөтүлгөн. Алардын арасында 99 адистештирилген жайгаштыруу каражаты, 367 мейманкана жана ага окшош жайгаштыруу каражаты, 12 жаратылыш паркы жана корук, ошондой эле башка 126 туристтик объект бар.

2026-жылдын январь–июнь айларында туризм тармагындагы дүң кошумча нарк 34 млрд сомду түздү. Бул ички дүң продукциянын 3,6%ына туура келет. Салыштыруу үчүн, 2025-жылдын ушул эле мезгилинде бул көрсөткүч 3,5% болгон. Туризм объектилерин курууга негизги капиталга салынган инвестициялар 15,9 млрд сомго жетти. Бул былтыркыга караганда 1,3 эсеге көп.

Улуттук статистика комитетинин маалыматына караганда, 2026-жылдын биринчи жарымында Кыргыз Республикасынын мамлекеттик чек арасынан 4,9 млн чет өлкөлүк жаран өткөн. Туристтер негизинен Өзбекстан, Казакстан, Россия жана Кытайдан келишет.