2-октябрында Бишкек шаарындагы Кыргыз улуттук көркөм сүрөт искусство музейинде сүрөтчү, график жана плакатист Асанбек Турумбековдун 90 жылдыгына арналган жеке көргөзмө ачылат. Ачылыш аземи саат 14:00дө музейдин 2-кабатында өтөт.

Көргөзмөгө сүрөтчүнүн чыгармачылык жолун чагылдырган 70ке жакын графика жана живопись эмгектери коюлат. Экспозицияга сүрөтчүнүн чабандардын турмушуна арналган пастель циклдери, балдар китептерине тарткан иллюстрациялары, ошондой эле «К новой жизни» (1969) жана «Встреча в горах» (1974) полотнолору кирет.

Асанбек Турумбеков 1936-жылы Кемин районунун Кайыңды айылында туулган. Ал 1955-жылы Фрунзе көркөм сүрөт окуу жайын бүтүргөн жана 1970-жылы СССР Сүрөтчүлөр союзуна мүчөлүккө кабыл алынган. Ал көп жылдар бою «Чалкан» сатиралык журналынын көркөм редактору кызматында эмгектенген. 1969-жылы Москвада өткөн көргөзмөдө анын «Свобода» жана «Голос Америки» плакаттары Күмүш медалга татыган.

Асанбек Турумбековдун эмгектери Бишкек, Москва, Ленинград жана София шаарларында көргөзмөгө чыккан жана Г. Айтиев атындагы Кыргыз улуттук көркөм сүрөт музейинин фондунда сакталууда.

Көргөзмө 18-октябрга чейин уланат.