VI Дүйнөлүк көчмөндөр оюндарынын жеңүүчүлөрү жана байге ээлери үчүн даярдалган алтын, күмүш жана коло медалдардын дизайны сунушталды.

Медалдардын концепциясы кыргыз элинин көчмөн философиясына негизделген. Ар бир медалдын борбордук бөлүгүндө Дүйнөлүк көчмөндөр оюндарынын логотиби жайгаштырылган.

"VI Дүйнөлүк көчмөндөр оюндарынын жеңүүчүлөрү дал ушул өзгөчө медалдар менен сыйланып, дүйнөлүк көчмөн спортунун тарыхында өз ысымдарын калтырышат",- деп билдирди уюштуруучулар.

Белгилей кетсек, VI Дүйнөлүк көчмөндөр оюндары Кыргызстанда 1-сентябрдан 6-сентябрга чейин өтөт. Оюндардын ачылыш аземи 31-августта Бишкекте «Бишкек Арена» стадионунда өтөт, ал эми калган иш-чаралар Ысык-Көл облусунда өткөрүлөт.